மிஃராஜ்

“எனக்கு உணவும் பானமும் வேண்டாம். நான் எதற்காகவும் கவலைப்படவில்லை. நான் இறைவனை வணங்கக்கூடிய ஒரு இடம் எனக்குப் போதுமானதாக இருக்கும்."
ஹதீஸ் அஷ்-ஷரீஃப்

எங்கள் அன்பிற்குரிய நபி (ஸல்லல்லாஹு அலைஹி வஸல்லம்) அவர்கள் ஹஜ்ஜுக்காகவோ அல்லது மக்காவின் சந்தைகளில் கொள்முதல் செய்யவோ வந்த அனைவருக்கும், அவர் பார்த்த ஒவ்வொரு கோத்திரத்தினருக்கும் இஸ்லாத்தை விளக்கினார். இஸ்லாத்தைப் பற்றி மக்களுக்குத் தெரிவிப்பதில் தன்னைப் பாதுகாத்து உதவுமாறு அவர் அவர்களிடம் கேட்டார். ஆனால், ஒருவரும் முஸ்லிமாகவில்லை, அவரைப் பாதுகாக்கவும் இல்லை. அத்துடன் அவர்கள் அவரை அவமதித்தார்கள், துன்புறுத்தினார்கள், சித்திரவதை செய்தார்கள், கேலி செய்தார்கள்; அவரை நிராகரித்தார்கள். உலகத்தின் தலைவர் மிகவும் சோர்வாகவும், பசியாகவும், தாகமாகவும், சோகமாகவும், ஆழ்ந்த துக்கத்துடனும் இருந்தார். இப்படியே பகற் பொழுதுகள் கடந்தன, இந்த நிலை இரவு வெகுநேரம் வரை தொடர்ந்தது. மக்கா பலதெய்வவாதிகள் தொடர்ந்து அவரைப் பின்தொடர்ந்தனர். கஃபாவைத் தரிசிக்க வந்தவர்களை முஸ்லிம்களாக மாற்றுவதை அவர்கள் தடுத்தது போல, ஹபீப் அல்-அக்ரமைத் துன்புறுத்தவும் அவர்கள் தயங்கவில்லை. எமது நாயகம் ரஸூலுல்லாஹ்வுக்கு இனி செல்ல இடம் இல்லை. எதிரிகள் எல்லா இடங்களிலும் இருந்தனர். மக்காவில் அந்த சில மாதங்கள் மிகவும் கடினமாக இருந்தன.

ரஜப் அஷ்-ஷரீஃப் மாதத்தின் 27 ஆவது இரவில், அவர் அபூதாலிபின் சுற்றுப்புறத்தில் உள்ள அவரது மாமா அபூதாலிபின் மகள் உம்மு ஹானியின் வீட்டிற்குச் சென்றார்.

அந்த நேரத்தில், உம்மு ஹானி இன்னும் முஸ்லிமாக மாறவில்லை. அவர், "யார் அங்கே?" என்று கேட்டபோது எமது நாயகம் ரஸூலுல்லாஹ், "நான் முஹம்மத், உங்கள் மாமாவின் மகன். நீங்கள் என்னை ஏற்றுக் கொண்டால், நான் இங்கு விருந்தினராகத் தங்க வந்துள்ளேன்." என்று கூறினார்.

உம்மு ஹானி நபியவர்களிடம், "உங்களைப் போன்ற ஒரு நேர்மையான, நம்பகமான, கௌரவமான, உன்னதமான விருந்தினருக்காக நான் மகிழ்ச்சியுடன் என் உயிரையும் தியாகம் செய்வேன். நீங்கள் வருகை தந்து, எங்களுக்கு கௌரவம் அளிப்பீர்கள் என்று முன்கூட்டியே சொல்லியிருந்தால், நான் ஏதாவது தயார் செய்திருப்பேன். இப்போது உமக்குக் கொடுக்க என்னிடம் உணவு இல்லை." என்றார். எமது நாயகம் ரஸூலுல்லாஹ், “எனக்கு உணவும் பானமும் வேண்டாம். நான் எதற்காகவும் கவலைப்படவில்லை. நான் இறைவனை வணங்கக்கூடிய ஒரு இடம் எனக்குப் போதுமானதாக இருக்கும்." என்றார்.

உம்மு ஹானி, நம்முடைய பிரியமான நபியை உள்ளே அழைத்துச் சென்று, அவருக்கு ஒரு மெத்தை, ஒரு பாத்திரம் மற்றும் ஒரு துணியைக் கொடுத்தார். அரேபியர்களிடையே விருந்தினருக்கு சேவை செய்வதும், எதிரிகளிடமிருந்து அவர்களைப் பாதுகாப்பதும் மிகவும் கௌரவமான கடமையாகக் கருதப்பட்டது. ஒரு வீட்டில் விருந்தினருக்கு ஏற்படும் எந்தத் தீங்கும் புரவலருக்கு பெரும் அவமானமாக இருக்கும். உம்மு ஹானி, "அவருக்கு மக்காவில் பல எதிரிகள் உள்ளனர். அவரைக் கொல்ல விரும்புவோர் கூட இருக்கிறார்கள். என் கௌரவத்தைப் பாதுகாக்க நான் காலை வரை அவரைப் பாதுகாப்பேன்" என்று நினைத்தவாறு, தந்தையின் வாளை எடுத்துக்கொண்டு வீட்டைச் சுற்றி நடக்க ஆரம்பித்தார்.

அன்று ரஸூலுல்லாஹ் பெரிதும் பாதிக்கப்பட்டிருந்தார். அவர் வுழூ செய்து, தனது ரப்பிடம் மன்றாடவும், மன்னிப்புக் கேட்கவும், மக்கள் ஈமான் பெறவும், பேரின்பத்தை அடையவும் பிரார்த்தனை செய்யத் தொடங்கினார். அவர் மிகவும் சோர்வாகவும், பசியாகவும், சோகமாகவும் இருந்தார். அவ்வாறு பாயில் படுத்து உறங்கினார்.

அந்த நேரத்தில், அல்லாஹு தஆலா ஜிப்ரஈல் அலைஹிஸ்ஸலாம் அவர்களிடம், “நான் என் அன்பான நபியை மிகவும் துக்கப்படுத்தினேன். அவருடைய அருள்மிகு உடலையும் அவரது மென்மையான இதயத்தையும் நான் பெரிதும் காயப்படுத்தினேன். ஆயினும், அவர் என்னைப் பிரார்த்தித்துக் கொண்டே இருக்கிறார். அவர் என்னைத் தவிர வேறு எதையும் நினைக்கவில்லை. செல்லுங்கள், என் ஹபீபை அழைத்து வாருங்கள்! அவருக்கு எனது ஜன்னாவையும் எனது ஜஹன்னத்தையும் காட்டுங்கள். அவருக்கும் அவரை நேசிப்பவர்களுக்கும் நான் தயாரித்துள்ள அருள்களை அவர் பார்க்கட்டும். அவரை நம்பாதவர்கள், தங்கள் வார்த்தைகள், எழுத்துக்கள் மற்றும் செயல்களால் அவரை காயப்படுத்தியவர்களுக்காக நான் தயாரித்த வேதனைகளை அவர் பார்க்கட்டும். நான் அவருக்கு ஆறுதல் கூறுவேன். அவருடைய மென்மையான இதயத்தின் காயங்களை நான் குணப்படுத்துவேன்." என்று கூறினான்.

ஜிப்ரஈல் அலைஹிஸ்ஸலாம் ரஸூலுல்லாஹ்வின் பக்கத்தில் வந்தபோது, ​​அவர் நன்றாகத் தூங்குவதைக் கண்டார். அவரை எழுப்ப மனம் வரவில்லை. அவர் மனித வடிவில் இருந்தார். அவர் அவரது அருள்வாய்ந்த பாதத்தின் அடிப்பகுதியில் முத்தமிட்டார். அவருக்கு இதயமோ இரத்தமோ இல்லாததால், அவரது குளிர்ந்த உதடுகள் ரஸூலுல்லாஹ்வை எழுப்பின. அவர் உடனடியாக ஜிப்ரஈல் அலைஹிஸ்ஸலாமை அடையாளம் கண்டுகொண்டார். மேலும் அல்லாஹு தஆலா அவர் மீது வருத்தப்படுவான் என்று பயந்து, அவர் ஜிப்ரஈலிடம், “என் சகோதரர் ஜிப்ரஈலே! ஏன் இப்படி ஒரு அசாதாரண நேரத்தில் வந்தீர்கள்? நான் தவறு செய்துவிட்டேனா, நான் என் ரப்பை புண்படுத்தினேனா? நீங்கள் எனக்குக் கெட்ட செய்தி கொண்டு வந்தீர்களா?" என்று கேட்டார்.

அதற்கு ஜிப்ரஈல் அலைஹிஸ்ஸலாம் அவர்கள், “படைப்பினங்களில் மேலானவரே! படைப்பாளனின் அன்பே, நபிமார்களின் தலைவரே, நன்மையினதும் மேன்மையினதும் ஊற்றுமூலமான, கண்ணியமிக்க சிறந்த நபியே! உங்கள் ரப் உங்களுக்குத் தனது ஸலாத்தை அனுப்பியுள்ளான், மேலும் உங்களைத் தன்னிடம் அழைக்கிறான். தயவுசெய்து எழுந்திருங்கள். நாம் போகலாம்." என்று கூறினார்கள்.

எங்கள் அன்பு நபி வுழூ செய்தார். ஜிப்ரஈல் அலைஹிஸ்ஸலாம் அவர்கள் நூரால் செய்யப்பட்ட தலைப்பாகையை நமது நாயகம் ரஸூலுல்லாஹ்வின் தலையில் அணிவித்து, அவருக்கு நூரின் ஆடையை அணிவித்து, அவரது இடுப்பில் மாணிக்கக் கச்சையை அணிவித்து, நானூறு செங்கோல் கொண்ட மரகதச் செங்கோலை அவரது கையில் கொடுத்தார். ஒவ்வொரு முத்துக்களும் சுக்கிரனைப் போல ஜொலித்துக் கொண்டிருந்தன. அவர் தனது அருள்வாய்ந்த பாதங்களில் பச்சை மரகதத்தால் செய்யப்பட்ட காலணிகளை அணிந்தார். 

“எனக்கு உணவும் பானமும் வேண்டாம். நான் எதற்காகவும் கவலைப்படவில்லை. நான் இறைவனை வணங்கக்கூடிய ஒரு இடம் எனக்குப் போதுமானதாக இருக்கும்."
ஹதீஸ் அஷ்-ஷரீஃப்

பின்னர் அவர்கள் இருவரும் கைகோர்த்துக் கொண்டு கஃபாவை வந்தடைந்தனர். அங்கே, ஜிப்ரஈல் அலைஹிஸ்ஸலாம் எங்கள் அன்பான நபியின் மார்பைப் பிளந்தார். அவரது இதயத்தை வெளியே எடுத்தார். அவர் அதை ஸம்ஸம் தண்ணீரில் கழுவினார். பின்னர் அவர் ஒரு கிண்ணம் நிறைந்த ஹிக்மத் மற்றும் ஈமானைக் கொண்டு வந்து, அவற்றை உள்ளே ஊற்றி அவரது மார்பை மூடினார்.

அதனைத் தொடர்ந்து, ஜிப்ரஈல் அலைஹிஸ்ஸலாம் அவர்கள் ஜன்னாவிலிருந்து கொண்டு வந்த புராக் என்ற வெள்ளை விலங்கைச் சுட்டிக்காட்டி, “ரஸூலல்லாஹ்வே! இதில் ஏறிக் கொள்ளுங்கள். எல்லா வானவர்களும் உமது வருகைக்காகக் காத்திருக்கின்றார்கள்" என்றார்கள். இதற்கிடையில், எமது நபி மீது ஒரு சோகம் குடியேறியது. அவர் சிந்திக்கத் தொடங்கினார். அந்த நேரத்தில் அல்லாஹு தஆலா ஜிப்ரஈல் அலைஹிஸ்ஸலாம் அவர்களிடம், “ஜிப்ரஈலே! ஏன் என் ஹபீப் சோகமாக இருக்கிறார் என்று கேட்பீராக!" என்றான். அவர் கேட்டபோது, நமது நாயகம் (ஸல்லல்லாஹு அலைஹி வஸல்லம்) இவ்வாறு பதிலளித்தார்: "நான் மிகவும் மதிக்கப்பட்டு கௌரவிக்கப்பட்டேன். கியாமத் (தீர்ப்பு) நாளில் எனது பலவீனமான உம்மத்தின் நிலை என்னவாக இருக்கும் என்பது என் நினைவுக்கு வந்தது. ஐம்பதாயிரம் ஆண்டுகளாக அரசாத்தில் (கூடும் இடத்தில்) நின்று பல பாவங்களைச் சகித்துக்கொண்டு, முப்பதாயிரம் வருடங்களாகச் செல்லும் ஸிராத் பாலத்தை எப்படி அவர்கள் கடப்பார்கள்?”

இறை ஆணை இவ்வாறு வந்தது: “எனது ஹபீபே! உறுதியாக இருங்கள். ஐம்பதாயிரம் வருட காலத்தை உமது உம்மத்திற்கு ஒரு கணம் போல் உணர வைப்பேன். வருத்தப்படாதீர்கள்!"

எங்கள் நபிகள் நாயகம் புராக் மீது ஏறினார். புராக் மிக வேகமாக சென்று கொண்டிருந்தது. ஒரு அடியில், அது கண்ணுக்குத் தெரியாத அளவுக்கு சென்றது. பயணத்தின் போது, ​​ஜிப்ரஈல் அலைஹிஸ்ஸலாம் அவர்கள் எமது அன்பு நபியவர்களிடம் சில இடங்களில் இறங்கி தொழுமாறு கூறினார்கள். இவ்வாறு, உலகத்தின் தலைவர் மூன்று இடங்களில் இறங்கித் தொழுதார். பின்னர் ஜிப்ரஈல் அலைஹிஸ்ஸலாம் அவர்கள், "தொழுகையை நிறைவேற்றிய அந்த இடங்கள் உங்களுக்குத் தெரியுமா?" என்று நபியவர்களிடம் கேட்டார். தனது சொந்தக் கேள்விக்குப் பதிலளித்த ஜிப்ரஈல் அலைஹிஸ்ஸலாம், முதல் இடம் மதீனா என்று கூறினார். நபியவர்கள் இந்த நகரத்திற்கு இடம்பெயரப் போவதாக நமது நபிக்கு அறிவித்தார். அடுத்த இடம் தூர் ஸினா என்று அவர் கூறினார். அங்குதான் ஹஸ்ரத் மூஸா திசையின்றி, தெரியாத வழியில் அல்லாஹு தஆலாவுடன் பேசினார். இறுதியாக, ஹஸ்ரத் ஈஸாவின் பிறந்த இடமான பைத் அல் லஹ்மில் அவர் தொழுதார். பின்னர் அவர்கள் குத்ஸில் (ஜெரூசலமில்) அமைந்துள்ள மஸ்ஜிதுல் அக்ஸாவை அடைந்தார்கள்.

மஸ்ஜிதுல் அக்ஸாவில், ஜிப்ரஈல் அலைஹிஸ்ஸலாம் அவர்கள் விரலால் பாறையில் துளையிட்டு அதில் புராக்கைக் கட்டினார். முந்தைய நபிமார்களின் ஆத்மாக்கள் மனித உருவில் அங்கு ஒன்று சேர்க்கப்பட்டன. நபி ஆதம், நூஹ் மற்றும் இப்ராஹீம் (அலைஹிமுஸ்-ஸலாம்) ஆகியோர் முறையே, ஜமாத்தாகத் தொழுகை நடாத்த இமாமாக முன்மொழியப்பட்டனர். அவர்கள் ஏற்றுக்கொள்ளவில்லை. அவர்கள் பின்வாங்கினர். ஜிப்ரஈல் ஹபீபுல்லாஹ்வை முன்மொழிந்து, அவரிடம், "நீங்கள் இருக்கும் போது வேறு யாரும் இமாம் ஆக முடியாது" என்று கூறினார்.

எமது நபிகள் நாயகம் நபிமார்களுக்கு இமாமாகி இரண்டு ரக்அத்கள் தொழுகை நடத்தினார். அதன்பிறகு நடந்ததை அவர் பின்வருமாறு விவரித்தார்:

“ஜிப்ரஈல் (அலைஹிஸ்ஸலாம்) எனக்கு ஒரு கோப்பை ஜன்னாவின் சர்பத்தையும் ஒரு கோப்பைப் பாலையும் கொண்டு வந்தார். நான் பாலை எடுத்தேன். நான் (இரண்டு உலகங்களின் பேரின்பத்தை) தேர்ந்தெடுத்துள்ளேன் என்று ஜிப்ரஈல் (அலைஹிஸ்ஸலாம்) என்னிடம் கூறினார். பின்னர் எனக்கு மேலும் இரண்டு கோப்பைகள் வழங்கப்பட்டன. ஒன்றில் தண்ணீரும் மற்றொன்றில் தேனும் இருந்தது. நான் இரண்டிலும் இருந்து குடித்தேன். அப்போது ஜிப்ரஈல் இவ்வாறு கூறினார்: "உங்கள் உம்மத் உலகம் அழியும் வரை நீடிக்கும் என்பதைத் தேன் குறிக்கிறது. மேலும் உங்கள் உம்மத் அவர்களது பாவங்களிலிருந்து தூய்மைப்படுத்தப்படும் என்பதை நீர் குறிக்கிறது." பின்னர் நாம் ஒன்றாக வானத்தில் ஏறினோம். ஜிப்ரஈல் (அலைஹிஸ்ஸலாம்) வாயிலைத் தட்டினார். "இது யார்?" என்று கேட்கப்பட்ட போது, "நான் ஜிப்ரஈல்" என்று அவர் சொன்னார்.

"உங்களுக்கு அடுத்தவர் யார்?" என்று கேட்கப்பட்டது.

"அவர் முஹம்மத் (அலைஹிஸ்ஸலாம்)" என்றார்.

“படைப்பினங்களில் மேலானவரே! படைப்பாளனின் அன்பே, நபிமார்களின் தலைவரே, நன்மையினதும் மேன்மையினதும் ஊற்றுமூலமான, கண்ணியமிக்க சிறந்த நபியே! உங்கள் ரப் உங்களுக்குத் தனது ஸலாத்தை அனுப்பியுள்ளான், மேலும் உங்களைத் தன்னிடம் அழைக்கிறான். தயவுசெய்து எழுந்திருங்கள். நாம் போகலாம்."
ஜிப்ரஈல் அலைஹிஸ்ஸலாம்

"அது (வானத்தில் ஏறுவதற்கான வஹி மற்றும் மிஃராஜ் அழைப்பிதழ்) அவருக்கு அனுப்பப்பட்டதா?" என்று கேட்கப்பட்டது. ஜிப்ரஈல், 'ஆம்' என்று பதிலளித்தார். அவர்கள், "வந்தவருக்கு மர்ஹபா (நல்வரவு) உண்டாகட்டும், அவர் எவ்வளவு அழகான பயணி!" என்றார்கள். உடனே வாயில் திறக்கப்பட்டது. நான் ஆதம் (அலைஹிஸ்ஸலாம்) அவர்களுக்கு முன்னால் நின்றேன். அவர் "மர்ஹபா" என்று கூறி எனக்காகப் பிரார்த்தனை செய்தார். சிலரின் ஆத்மாக்கள் ஆதமின் வலது மற்றும் இடதுபுறத்தில் நின்று கொண்டிருந்தன. ஆதம் (அலைஹிஸ்ஸலாம்) வலது பக்கம் பார்க்கும் போதெல்லாம் அவர் புன்னகைத்தார்; இடது பக்கம் பார்க்கும் போதெல்லாம் அவர் அழுதார். அப்போது, ஜிப்ரஈல் (அலைஹிஸ்ஸலாம்), "ரஸூலல்லாஹ்வே! இந்த உருவங்கள் ஆதமின் சந்ததியினரின் ஆத்மாக்களாகும். வலப்பக்கத்தில் இருப்பவர்கள் சுவர்க்கவாசிகள், இடப்பக்கத்தில் இருப்பவர்கள் நரகவாசிகள். அதனால்தான் அவர் வலது பக்கம் பார்க்கும் போது புன்னகைக்கிறார்; இடது பக்கம் பார்க்கும் போது அழுகிறார்!" என்று கூறினார். 

நான் அங்கு பல வானவர்களைப் பார்த்தேன். அவர்கள் அனைவரும் கியாமில் (நின்ற நிலையில்) குஷூ (ஆழமான, பணிவான பயபக்தியுடன்) 'சுப்பூஹுன் குத்தூஸுன் ரப்புல்-மலாஇகதி வர்-ரூஹ்' என்ற திக்ரில் மும்முரமாக இருந்தனர். நான் ஜிப்ரஈலிடம், "இதுதான் இந்த வானவர்களின் தொழுகையா?" என்று கேட்டேன். அவர், "ஆமாம். அவர்கள் படைக்கப்பட்ட நாளிலிருந்து மறுமை நாள் வரை அவர்கள் நின்ற நிலையில் நிலைத்திருப்பார்கள். அல்லாஹு தஆலாவிடம் கேளுங்கள், அதனால் அவன் உங்கள் உம்மத்திற்கு இந்த வணக்கத்தை வழங்குவான்" என்று கூறினார். நான் ஹக் தஆலாவிடம் கேட்டேன். அவன் என் பிரார்த்தனையை ஏற்றுக்கொண்டான். அதுதான் தொழுகையிலுள்ள கியாம் ஆகும்.

(அங்கு) ஒரு கூட்டத்தினரை நான் சந்தித்தேன். வானவர்கள் அந்த மக்களின் தலைகளை அடித்து நொறுக்குவார்கள், அவர்களின் தலைகள் முந்தைய நிலைக்குத் திரும்பும். அவர்கள் மீண்டும் ஒரு முறை அடிப்பார்கள், அவர்களின் தலைகள் மீண்டும் பழைய வடிவத்தை எடுக்கும். நான், "அவர்கள் யார்?" என்று வினவினேன். அதற்கு அவர், "அவர்கள் ஜும்ஆ (வெள்ளிக்கிழமை தொழுகை)யையும் ஜமாஅத்தையும் விட்டு விடுபவர்கள், ருகூஉ (தொழுகையின் போது குனிந்து வணங்குதல்) மற்றும் ஸஜ்தாக்களை (முன்முகம் சாய்த்து வணங்குதல்) சரியாகச் செய்யாதவர்கள்." என்று பதிலளித்தார்.

நான் ஒரு கூட்டத்தைப் பார்த்தேன். அவர்கள் பசியுடனும் நிர்வாணத்துடனும் இருந்தனர். ஜஹன்னமுக்குப் பொறுப்பான வானவர்கள் ஜஹன்னத்தில் அவர்களைத் தள்ளினார்கள். நான், "அவர்கள் யார்?" என்று கேட்டேன். அவர், "இவர்கள் ஏழைகளுக்கு இரக்கம் காட்டாதவர்கள், ஸகாத் கொடுக்காதவர்கள்' என்று பதிலளித்தார்.

நான் ஒரு கூட்டத்தினரை சந்தித்தேன். அவர்களுக்கு முன்னால் சுவையான உணவுகள் இருந்தன. ஒரு இறந்த உடலும் இருந்தது. அவர்கள் அந்த சுவையான உணவை விட்டுவிட்டு அந்த இறந்த உடலை சாப்பிட்டுக் கொண்டிருந்தனர். நான், "அவர்கள் யார்?" என்று கேட்டேன். (அதற்கு) அவர், "இவர்கள் ஹலாலை விட்டு விலகி, ஹராமின் பக்கம் சாய்ந்த ஆண்களும் பெண்களும் ஆவார்கள். அவர்கள் ஹலால் இருக்கும் நிலையில் ஹராத்தை உண்பவர்கள்." என்று கூறினார்.

முதுகில் அதிக சுமையால் நகர முடியாமல் (சிலரை) நான் பார்த்தேன். அந்த நிலையில், அவர்கள் மக்களைக் கூப்பிட்டு, அவர்கள் மீது இன்னும் அதிக சுமையை வைக்கும்படி கேட்டுக் கொண்டனர். நான், "அவர்கள் யார்?" என்று கேட்டேன். அதற்கு அவர் "அவர்கள்தான் வரம்பு மீறியவர்கள். மக்களின் உரிமைகளை அவர்கள் பறித்துக்கொண்டிருந்தாலும், அவர்களைத் தொடர்ந்து துன்புறுத்தினார்கள்." என்று கூறினார்.

தங்கள் சொந்த சதையை வெட்டி சாப்பிட்டுக் கொண்டிருந்த ஒரு கூட்டத்திடம் நாங்கள் நின்றோம். நான், "அவர்கள் யார்?" என்று கேட்டேன். ஜிப்ரஈல் (அலைஹிஸ்ஸலாம்), "அவர்கள் புறம் பேசுபவர்கள் மற்றும் வதந்திகளைப் பரப்புபவர்கள்" என்று கூறினார்.

கருப்பு முகமும், நீல நிறக் கண்களும், மேல் உதடுகள் நெற்றியை எட்டும், கீழ் உதடுகள் கால்களுக்கு கீழே தொங்கும், வாயில் இருந்து இரத்தமும் சீழும் வடியும் ஒரு கூட்டத்தை நான் பார்த்தேன். ஜஹன்னமிலிருந்து வடியும் நச்சு இரத்தத்தையும் சீழையும் நெருப்புக் குவளைகளில் குடிக்க நிர்பந்திக்கப்பட்ட அவர்கள் கழுதைகளைப் போல் கதறிக் கொண்டிருந்தனர். நான், "அவர்கள் யார்?" என்று கேட்டேன். அவர், "இவர்கள் மது அருந்துபவர்கள்" என்று சொன்னார்.

நாங்கள் ஒரு குழுவினரை சந்தித்தோம். அவர்கள் சித்திரவதை செய்யப்பட்டபோது அவர்களின் நாக்குகள் தலைகளிலிருந்து வெளியேற்றப்பட்டு, அவர்களின் வடிவங்கள் மாற்றப்பட்டு பன்றிகளாக மாறின. ஜிப்ரஈல் (அலைஹிஸ்ஸலாம்), "இவர்கள் பொய்ச் சத்தியம் செய்பவர்கள்" என்று கூறினார்.

நாங்கள் மற்றொரு குழுவினரை சந்தித்தோம். அவர்களின் வயிறுகள் வெளிறி, மெல்லியதாக, அவர்களின் நிறங்கள் நீல நிறமாகி, அவர்களின் கைகளும் கால்களும் கட்டப்பட்டிருந்தன. அவர்களால் எழுந்திருக்க முடியவில்லை. நான் அவர்களைப் பற்றி ஜிப்ரஈலிடம் கேட்டேன். "இவர்கள் ஃபாஇஸ் (வட்டி) எடுத்தவர்கள்" என்று அவர் கூறினார்.1

நாங்கள் சில பெண்களை சந்தித்தோம். அவர்களின் முகங்கள் கருமையாக, கண்கள் நீலமாக இருந்தன. அவர்கள் நெருப்பிலான ஆடை அணிந்திருந்தனர். வானவர்கள் அவர்களை நெருப்புக் கோடரியால் அடித்தனர். அவர்கள் நாய்கள் மற்றும் பன்றிகள் போல் குரைத்தனர். நான், "அவர்கள் யார்?" என்று கேட்டேன். ஜிப்ரஈல், 'இவர்கள் விபச்சாரம் செய்து கணவனைக் காயப்படுத்திய பெண்கள்" என்றார்.

நான் ஒரு குழுவைப் பார்த்தேன். அவர்கள் மிகவும் கூட்டமாக இருந்தனர். அவர்கள் ஜஹன்னம் பள்ளத்தாக்குகளில் சிறை வைக்கப்பட்டிருந்தனர். நெருப்பு அவர்களை எரித்தது, பின்னர் அவர்கள் உயிர்த்தெழுப்பப்பட்டார்கள், நெருப்பு அவர்களை மீண்டும் எரித்தது. நான், "அவர்கள் யார்?" என்று கேட்டேன். அவர், "இவர்கள் தந்தைக்குக் கீழ்ப்படியாதவர்கள்" என்று கூறினார்.

நான் ஒரு கூட்டத்தினரிடம் நின்றேன். அவர்கள் பயிர்களை விதைத்தனர். பயிர்கள் உடனடியாக வளர்ந்து கொண்டிருந்தன. நான், "அவர்கள் யார்?" என்று கேட்டேன். "இவர்கள் அல்லாஹு தஆலாவுக்காக மட்டுமே இபாதத்கள் (வணக்கங்கள்) செய்தவர்கள்" என்று ஜிப்ரஈல் கூறினார்.

நான் ஒரு கடலுக்கு அருகில் வந்தேன். அந்தக் கடலின் அசாதாரண நிலையை விளக்க இயலாது. அது பாலை விட வெண்மையாகவும், மலை போன்ற அலைகளை உடையதாகவும் இருந்தது. நான், "இது என்ன கடல்?" என்று கேட்டேன். அவர், "இந்தக் கடலுக்கு உயிர்ப்பிக்கும் கடல் என்று பெயர். இறந்தவர்களை உயிர்ப்பிக்கும் போது ஹக் தஆலா இந்தக் கடலில் இருந்து மழையைப் பொழியச் செய்வான். அதன்மூலம் அழுகிய மற்றும் சிதறிய உடல்கள் புதைகுழிகளில் இருந்து புல் முளைப்பது போல எழும்..." என்று கூறினார்.

பின்னர், நாங்கள் வானத்தின் இரண்டாவது அடுக்குக்கு ஏறினோம். ஜிப்ரஈல் (அலைஹிஸ் ஸலாம்) மீண்டும் வாயிலைத் தட்டினார். "யார் இவர்?" என்றார்கள். "நான் ஜிப்ரஈல்." என்று அவர் சொன்னார்.

"உங்களுக்கு அடுத்தவர் யார்?" என்று கேட்கப்பட்டது.
"அவர் முஹம்மத் (அலைஹிஸ்ஸலாம்)" என்றார்.

"அது (வானத்தில் ஏறுவதற்கான வஹி மற்றும் மிஃராஜ் அழைப்பிதழ்) அவருக்கு அனுப்பப்பட்டதா?" என்று கேட்கப்பட்டது.

ஜிப்ரஈல், 'ஆம்' என்று பதிலளித்தார். அவர்கள், "வந்தவருக்கு மர்ஹபா (நல்வரவு) உண்டாகட்டும், அவர் எவ்வளவு அழகான பயணி!" என்றார்கள். உடனே வாயில் திறக்கப்பட்டது.

"அவர்கள், "வந்தவருக்கு மர்ஹபா (நல்வரவு) உண்டாகட்டும், அவர் எவ்வளவு அழகான பயணி!" என்றார்கள். உடனே வாயில் திறக்கப்பட்டது. நான் ஆதம் (அலைஹிஸ்ஸலாம்) அவர்களுக்கு முன்னால் நின்றேன்."
ஹதீஸ் அஷ்-ஷரீஃப்

உறவினர்களான ஈஸா மற்றும் யஹ்யா இப்னு ஸகரிய்யா (ஜான், ஸகரிய்யாவின் மகன்) (அலைஹிமஸ் ஸலாம்) ஆகியோர் அங்கிருப்பதைக் கண்டேன். அவர்கள் என்னிடம், 'மர்ஹபா' என்று கூறி, எனக்காகப் பிரார்த்தனை செய்தார்கள்... (ஈஸா அலைஹிஸ்ஸலாம் நடுத்தர உயரமும் கோதுமை நிறமும் கொண்டவர்.)

நான் வானவர்களின் குழுவைக் கண்டேன். ஒரு வரிசையை உருவாக்கி, அவர்கள் அனைவரும் ருகூவில் இருந்தனர். அவர்கள் தங்களுக்கென்று ஒரு தஸ்பிஹ் (திக்ர்) வைத்திருந்தார்கள். அவர்கள் தொடர்ந்து ருகூவின் நிலையில் இருந்தார்கள். மேலே பார்க்கவோ அல்லது தலையை உயர்த்தவோ இல்லை. ஜிப்ரஈல் (அலைஹிஸ்ஸலாம்),"இந்த வானவர்கள் இப்படித்தான் வணங்குகிறார்கள். ஹக் தஆலாவிடம் கேளுங்கள், அவர் உங்கள் உம்மத்துக்கு இதை வழங்குவான்." என்று கூறினார். நான் கேட்டேன். அவன் தொழுகையில் ருகூவை ஏற்றுக்கொண்டு வழங்கினான்.

பின்னர் நாங்கள் வானத்தின் மூன்றாவது அடுக்குக்கு ஏறினோம். அதே கேள்வி மற்றும் பதிலுக்குப் பிறகு, கதவு திறக்கப்பட்டது. நான் யூசுஃப் (அலைஹிஸ்ஸலாம், ஜோசப்) அருகில் இருந்தேன். எல்லா அழகிலும் பாதி அவருக்குக் கொடுக்கப்பட்டிருப்பதைக் கண்டேன். அவர் என்னிடம், 'மர்ஹபா' என்று கூறி, எனக்காகப் பிரார்த்தனை செய்தார்.

நான் பல வானவர்களைக் கண்டேன். வரிசையாக அவர்கள் அனைவரும் ஸஜ்தாவில் இருந்தனர். அவர்கள் படைக்கப்பட்டதிலிருந்து, அவர்கள் ஸஜ்தாவில் இருந்து தங்களுக்குத் தனித்துவமான தஸ்பிஹ்களைச் செய்து வருகின்றனர். ஜிப்ரஈல் (அலைஹிஸ்ஸலாம்), "இந்த வானவர்கள் இப்படித்தான் வணங்குகிறார்கள். அல்லாஹு தஆலாவிடம் கேளுங்கள். அதனால் அவன் உங்களது உம்மத்துக்கு இதை வழங்குவான்." என்றார். நான் கேட்டேன். அவன் தொழுகையில் இதை ஏற்றுக்கொண்டு உங்களுக்கு வழங்கினான்.

பின்னர் நான் வானத்தின் நான்காவது அடுக்கை அடைந்தேன். தூய வெள்ளியால் செய்யப்பட்ட ஒளிக்கதவு இருந்தது. அதில் நூரால் செய்யப்பட்ட பூட்டு இருந்தது. பூட்டில் 'லா இலாஹ இல்லல்லாஹ் முஹம்மதுன் ரஸூலுல்லாஹ்' என்று எழுதப்பட்டிருந்தது. அதே கேள்வி மற்றும் பதிலுக்குப் பிறகு, கதவு திறக்கப்பட்டது, நான் இத்ரீஸ் (அலைஹிஸ்ஸலாம்) அருகில் என்னைக் கண்டேன். அவர் என்னிடம், 'மர்ஹபா' என்று கூறி, எனக்காகப் பிரார்த்தனை செய்தார். அல்லாஹு தஆலா அவரைப் பற்றி (மஆலில்), "நாம் அவரை உயர்ந்த இடத்திற்கு உயர்த்தினோம்." என்று குறிப்பிட்டுள்ளான்.2

நான் ஒரு வானவரைப் பார்த்தேன். அவர் ஒரு சிம்மாசனத்தில் அமர்ந்திருந்தார். வருத்தமாகவும் சோகமாகவும் இருந்தார். அவரைச் சுற்றி பல வானவர்கள் இருந்தார்கள். அவர்களின் எண்ணிக்கை ஜனாப் அல்-ஹக்கிற்கு மட்டுமே தெரியும். அவருடைய வலதுபுறத்தில் நூரானி (ஒளிரும்) வானவர்களைக் கண்டேன். அவர்கள் பச்சை நிற ஆடைகளை அணிந்து மிகவும் நல்ல வாசனையுடன் இருந்தனர். அவர்களின் அழகு காரணமாக அவர்களின் முகத்தைப் பார்க்க முடியவில்லை. அந்த வானவரின் இடது பக்கத்தில், வானவர்கள் தங்கள் வாயிலிருந்து நெருப்பை உமிழ்ந்து கொண்டிருந்தார்கள். அவர்களுக்கு முன்னால் ஈட்டிகளும் நெருப்புக் கசைகளும் இருந்தன. அவர்களைப் பார்ப்பது சகிக்க முடியாத அளவுக்கு அவர்களது கண்கள் இருந்தன. சிம்மாசனத்தில் அமர்ந்திருந்த வானவர் தன் தலை முதல் கால் வரை கண்களைக் கொண்டிருந்தார். அவர் எப்பொழுதும் தனக்கு முன்னால் இருக்கும் பதிவேட்டையே பார்த்துக் கொண்டிருந்தார். ஒரு கணம் கூட அதிலிருந்து கண்களை எடுக்கவில்லை. அவருக்கு எதிரே ஒரு மரம் இருந்தது. ஒவ்வொரு இலையிலும் ஒருவரின் பெயர் எழுதப்பட்டிருந்தது. அவருக்கு முன்னால் ஒரு கிண்ணம் போன்ற ஒன்று இருந்தது. சில நேரங்களில் அவர் தனது வலது கையால் அதிலிருந்து எதையாவது எடுத்து தனது வலதுபுறத்தில் உள்ள நூரானி (ஒளிரும்) வானவர்களுக்கு வழங்குவார்; சில சமயங்களில் அவர் தனது இடது கையால் எதையாவது எடுத்து தனது இடதுபுறத்தில் உள்ள ழுல்மானி (இருண்ட) வானவர்களுக்கு வழங்குவார். நான் (அந்த) (வானவரை) மலக்கைப் பார்த்தபோது, என் இதயம் பயத்தால் நடுங்கியது. நான் ஜிப்ரஈலிடம், "அந்த மலக்கு யார்?" என்று கேட்டேன். (அதற்கு) அவர், "இது இஸ்ராயீல் (மரணத்துக்குப் பொறுப்பான மலக்கு). அவரது முகத்தை பார்த்தால் யாராலும் தாங்கிக் கொள்ள முடியாது." என்று கூறினார்.

அவர் அவரிடம் சென்று, "ஓ இஸ்ராயீலே! இவர்தான் கடைசி யுகத்தின் நபியும் அல்லாஹு தஆலாவின் ஹபீபும் பிரியமானவரும் ஆவார்" என்று கூறினார். இஸ்ராயில் (அலைஹிஸ் ஸலாம்) தனது தலையை உயர்த்தி சிரித்தார். அவர் எழுந்து பயபக்தியுடன் என்னிடம், "மர்ஹபா! ஹக் தஆலா உங்களை விட கௌரவமான யாரையும் படைக்கவில்லை. அதுபோல், உங்கள் உம்மத் அனைத்து உம்மத்களையும் விட உயர்ந்தது. அவர்களின் பெற்றோரை விட உங்கள் உம்மத்தின் மீது எனக்கு அதிக இரக்கம் உண்டு" என்று சொன்னார். நான் அவரிடம், "உங்களிடமிருந்து எனக்கு ஒரு கோரிக்கை இருக்கிறது. என் உம்மத் பலவீனமானது. அவர்களிடம் மென்மையாக நடந்து கொள்ளுங்கள். அவர்களின் ஆன்மாக்களை கனிவுடன் கைப்பற்றுங்கள்." என்று சொன்னேன். பிறகு அவர், "உம்மை இறுதி நபியாக அனுப்பி, உம்மை அவனுடைய ஹபீப் ஆக்கிய அல்லாஹு தஆலாவின் பொருட்டு, அல்லாஹு தஆலா எனக்கு இரவும் பகலும் எழுபது முறை, "உம்மத்துல் முஹம்மதின் ஆன்மாக்களை மென்மையாகக் கைப்பற்றுவீராக. எளிதாகவும், கிருபையுடனும் அவர்களுக்குச் சேவை செய்வீராக." என்று கட்டளையிடுகிறான். அதனால்தான் அவர்களின் பெற்றோரை விட நான் உங்கள் உம்மத்தின் மீது அதிக இரக்கமுள்ளவனாக இருக்கிறேன்" என்றார்.

பின்னர் நாங்கள் வானத்தின் ஐந்தாவது அடுக்குக்கு ஏறி அங்கு ஹாரூன்3(ஆரோன்)(அலைஹிஸ்ஸலாம்) அவர்களைச் சந்தித்தோம், அவர் என்னிடம், "மர்ஹபா" என்று கூறி, எனக்காகப் பிரார்த்தனை செய்தார்.

வானங்களின் ஐந்தாம் அடுக்கின் வானவர்களின் இபாதத்தை நான் கண்டேன். அவர்கள் அனைவரும் நின்று கொண்டு தங்கள் கால்விரல்களைப் பார்த்துக் கொண்டே இருந்தனர், வேறு எங்கும் பார்க்காமல், உரத்த குரலில் தஸ்பீஹை கூறிக் கொண்டிருந்தனர். நான் ஜிப்ரஈல் (அலைஹிஸ் ஸலாம்) இடம், "இது இந்த வானவர்களின் இபாதத்தா?" என்று வினவினேன். அதற்கு அவர், "ஆம், ஹக் தஆலாவிடம் கேளுங்கள், அவன் உங்கள் உம்மத்துக்கு இதை வழங்குவான்" என்று பதிலளித்தார். நான் கேட்டேன். ஜனாப் அல்-ஹக் வழங்கினான்.

பின்னர் நாம் வானத்தின் ஆறாவது அடுக்குக்கு ஏறினோம். நாங்கள் அங்கு மூஸா (அலைஹிஸ்ஸலாம்) அவர்களைச் சந்தித்தோம். அவர் என்னிடம், 'மர்ஹபா' என்று கூறி, எனக்காகப் பிரார்த்தனை செய்தார்.

பின்னர் நாம் வானத்தின் ஏழாவது அடுக்குக்கு ஏறினோம். அதே கேள்வி மற்றும் பதிலுக்குப் பிறகு, இப்ராஹீம் (அலைஹிஸ்ஸலாம்) பைத் அல்-மஃமூருக்கு எதிர்திசையில் சாய்ந்தவராக இருப்பதைக் கண்டேன். பைத் அல்-மஃமூர் என்பது ஒவ்வொரு நாளும் எழுபதாயிரம் மலக்குகள் நுழையும் இடமாகும் (அவர்கள் மீண்டுமொரு தடவை வரவே மாட்டார்கள்). நான் இப்ராஹீம் (அலைஹிஸ் ஸலாம்) அவர்களுக்கு சலாம் கூறினேன். அவர் என் சலாத்திற்குப் பதிலளித்தார். அவர், 'மர்ஹபா ஸாலிஹ் (பக்தியுள்ள, அர்ப்பணிப்புள்ள) நபியே, ஸாலிஹ் மகனே!" என்று கூறினார். (பிறகு) அவர், 'முஹம்மதே! ஜன்னாவின் நிலம் மிகவும் மென்மையானது, அதன் மண் சுத்தமானது. உமது உம்மத்திடம் பல மரங்களை அங்கே நடச் சொல்லுங்கள்" என்றார். நான், "அவர்கள் எப்படி ஜன்னத்தில் மரம் நடுவார்கள்?" என்று கேட்டேன். அவர், "லா ஹவ்ல வலா குவ்வத இல்லா பில்லாஹ்' என்ற தஸ்பிஹ் கூறுவதன் மூலம் (மற்றொரு அறிவிப்பின்படி, 'சுப்ஹானல்லாஹி வல்ஹம்துலில்லாஹி வலா இலாஹ இல்லல்லாஹு வல்லாஹு அக்பர்' எனக் கூறுவதன் மூலம்)" என்று அவர் கூறினார். பிறகு ஜிப்ரஈல் (அலைஹிஸ்ஸலாம்) என்னை சித்ரத்துல் முன்தஹாவுக்கு அழைத்துச் சென்றார். சித்ரத் அல்-முன்தஹா என்பது ஒரு மரமாகும். அதன் வேர்கள் வானத்தின் ஆறாவது அடுக்கில் உள்ளன. அதன் தண்டு மற்றும் கிளைகள் வானத்தின் ஏழாவது அடுக்குக்கு மேலே உள்ளன. அதன் இலைகள் யானைக் காதுகள் போலவும், பழங்கள் கோபுரங்களைப் போலவும் இருக்கும்.4 அது வானங்கள் அனைத்திற்கும் ஜன்னத்திற்கும் நிழல் தரும் ஒரு மரம் போன்றது. அல்லாஹு தஆலாவின் மகத்துவம் மற்றும் மகிமையின் நூரின் வெளிப்பாட்டுடன், அது வண்ணங்களைப் பெற்று, மாணிக்கங்கள், மரகதம் மற்றும் பிற ஆபரணங்களால் அலங்கரிக்கப்பட்டு, அல்லாஹு தஆலாவின் எந்த உயிரினமும் அதன் அழகை விவரிக்க முடியாத அளவுக்கு அழகாக மாறும்.

ஜிப்ரஈல் (அலைஹிஸ்ஸலாம்) என்னை சித்ரத்துல் முன்தஹாவுக்கு அப்பால் அழைத்து வந்து என்னிடம் விடைபெற்றார். நான், "ஜிப்ரஈலே! நீர் என்னைத் தனியாக விட்டுப் போகிறீரா?" என்று கேட்டேன்.  (அப்போது) ஜிப்ரஈல் (அலைஹிஸ்ஸலாம்) அவர்களைக் கவலை சூழ்ந்தது. அவர் ஹக் தஆலாவின் மகத்துவத்தால் நடுங்கத் தொடங்கி, "முஹம்மதே! நான் இன்னும் ஒரு அடி எடுத்து வைத்தால் அல்லாஹு தஆலாவின் மகத்துவத்தால் அழிந்து விடுவேன். என் உடல் முழுவதும் எரிந்து அழிந்து போகும்." என்றார்.”

உலகத்தின் தலைவர், ஜிப்ரஈல் அலைஹிஸ்ஸலாம் அவர்களுடன் அவ்வளவு தூரம்தான் பயணம் செய்தார். அங்கே, ஜிப்ரஈல் அலைஹிஸ்ஸலாம் ரஸூலுல்லாஹ்வுக்குத் தன்னை வெளிப்படுத்தினார், அவர் படைக்கப்பட்ட வடிவத்தில், அவரது அறுநூறு ஆயிரம் இறக்கைகள் விரிக்கப்பட்டன. ஒவ்வொரு இறக்கைகளிலும் முத்துக்கள் மற்றும் இரத்தினங்கள் சிதறிக்கிடந்தன.

பின்னர் ரஃப்ரஃப் என்ற பெயருடைய ஜன்னாவின் பச்சைக் கம்பளம் வந்தது. அதன் ஒளி சூரியனை விடப் பிரகாசமாக இருந்தது. அது அல்லாஹு தஆலாவின் திக்ரில் (அவனை நினைவு கூர்வதும், அவனுடைய பெயரைக் குறிப்பிடுவதும்) தொடர்ந்து மும்முரமாக இருந்தது. மேலும் தஸ்பீஹ் செய்யும் சத்தம் அவர் இருந்த மண்டலத்தை நிரப்பியது.

அது எமது நபியை வாழ்த்தியது. பின்னர் ரஸூலுல்லாஹ் ரஃப்ரஃப் மீது அமர்ந்தார். ஒரு நொடியில், அவர்கள் மிக உயரத்திற்கு ஏறி, ஹிஜாப் எனப்படும் எழுபதாயிரம் திரைச்சீலைகளைக் கடந்து சென்றார்கள். ஒவ்வொரு ஹிஜாபிற்கும் இடையே அதிக தூரம் இருந்தது. ஒவ்வொரு திரைச்சீலைக்கும் வானவர்கள் பொறுப்பாக இருந்தனர். ரஃப்ரஃப் நம் நபியை ஒவ்வொன்றாக திரைச்சீலைகள் வழியாக அழைத்துச் சென்றது. இவ்வாறு, அவர்கள் குர்ஸி, அர்ஷ் மற்றும் ஆன்மாக்களின் மண்டலத்திற்கு அப்பால் சென்றனர்.

"அன்றிரவு (மிஃராஜ் இரவு), எனது உம்மத்தின் கணக்கை என்னிடம் ஒப்படைக்குமாறு அல்லாஹு தஆலாவிடம் கேட்டேன்."
ஹதீஸ் அஷ்-ஷரீஃப்

ஒவ்வொரு திரைச்சீலையையும் கடந்து செல்லும் போது, எமது நாயகம், ஹபீப் அல்-அக்ரம் மற்றும் நபி அல்முஹ்தரம் (ஸல்லல்லாஹு அலைஹி வஸல்லம்) அவர்கள் ஒரு கட்டளையைக் கேட்பார்கள், “அஞ்ச வேண்டாம், முஹம்மதே! அருகில் வாருங்கள், அருகில் வாருங்கள்!” என்பதாக அது இருந்தது. அவர் காப கவ்ஸைன் மட்டத்தை அடைந்த போது அவர் அந்த கட்டளைக்கு மிகவும் நெருக்கமாக இருந்தார். அறியப்படாத, புரிந்துகொள்ள முடியாத மற்றும் விவரிக்க முடியாத வகையில் அல்லாஹு தஆலா விரும்பியளவு உயரங்களை அவர் அடைந்தார். இடமின்றி, நேரமின்றி, திசை அல்லது பண்பு இன்றி, ருஃயத் நிகழ்ந்தது. அதாவது, அவர் அல்லாஹு தஆலாவைப் பார்த்தார். கண்கள், காதுகள், பொருள் அல்லது இடம் இல்லாமல் அவர் தனது ரப்புடன் பேசினார். எந்த ஒரு உயிரினமும் அறிய முடியாத அல்லது புரிந்து கொள்ள முடியாத பாக்கியங்களை அவர் அடைந்தார்.

ஹஸ்ரத் இமாம் அர்-ரப்பானி தனது மக்தூபாத்தில் பின்வருமாறு கூறுகிறார்: “மிஃராஜ் இரவில், அந்த சர்வார் (அலைஹிஸ்ஸலாத்து வஸ்ஸலாம்) தனது ரப்பை இந்த உலகில் அல்ல, ஆகிரத்தில் - மறு உலகில் பார்த்தார். ஏனெனில் அன்றிரவு ரஸூல் அலைஹிஸ்ஸலாம் அவர்கள் நேரம் மற்றும் வெளியின் சட்டகத்தை விட்டு வெளியேறினார். அவர் ஒரு நித்திய தருணத்தைக் கண்டார். தொடக்கத்தையும் முடிவையும் ஒரு புள்ளியாகப் பார்த்தார். அந்த இரவில், ஆயிரக்கணக்கான ஆண்டுகளுக்குப் பிறகு, ஜன்னாவுக்குச் செல்லப்போகும், ஜன்னாவில் இருப்பவர்களையும் அவர் கண்டார். அந்தத் தரத்தில் பார்ப்பது உலகில் பார்ப்பது அல்ல. அது ஆகிரத்தில் பார்ப்பதைப் போல் பார்ப்பதாகும்.

எமது நபிகள் நாயகம் (ஸல்) அவர்களிடம், "உங்கள் ரப்பைப் போற்றுங்கள்!" எனக் கட்டளையிடப்பட்டது. உடனே அவர், “அத்தஹிய்யாத்து லில்லாஹி வஸ்ஸலவாத்து வதய்யீபாத் (அதாவது, எல்லா மொழிகளிலும் புகழும், பாராட்டும், போற்றுதலும், உடலால் செய்யப்படும் சேவைகளும், வழிபாடுகளும், சொத்துக்களால் செய்யப்படும் நன்மைகளும், நலவுகளும் அல்லாஹு தஆலாவுக்கே உண்டாகட்டும்)” என்றார்.

முதலில், அல்லாஹு தஆலா தனது ஹபீபை கண்கள், காதுகள், பொருள் அல்லது இடம் இல்லாமல் "அஸ்ஸலாமு அலைக அய்யுஹன்னபிய்யு வ ரஹ்மதுல்லாஹி வ பரகாதுஹ் (என் ரஸூலே! என் ஸலாமும், அருளும், கருணையும் உங்கள் மீது உண்டாவதாக)" என்று கூறி வாழ்த்தினான். எமது நபிகள் நாயகம், “அஸ்ஸலாமு அலைனா வ அலா இபாதில்லாஹிஸ் ஸாலிஹீன் (என் ரப்பே! எங்கள் மீதும் உமது ஸாலிஹ் [பக்தியுள்ள] அடியார்கள் மீதும் ஸலாம் உண்டாகட்டும்)” என்று பதிலளித்தார்.

இதைக் கேட்ட மலக்குகள் அனைவரும் சேர்ந்து, "அஷ்-ஹது அன் லா இலாஹ இல்லல்லாஹு வ அஷ்-ஹது அன்ன முஹம்மத் அப்துல்லாஹ் வ ரஸூலுஹ்" என்று கூறினார்கள். (பொருள்: அல்லாஹ்வையன்றி வேறு கடவுள் இல்லை என்றும், முஹம்மத் ஸல்லல்லாஹு அலைஹி வஸல்லம் அவனுடைய அடியானும், தூதருமாவார் என்பதையும் நான் என் கண்களால் பார்த்தது போல் நம்புகிறேன்.)

எமது நபி, “அஸ்ஸலாமு அலைனா...” என்று கூறியபோது, அல்லாஹு தஆலா, “என் ஹபீபே! இங்கு எங்கள் இருவரைத் தவிர வேறு யாரும் இல்லை. ஏன் அலைனா (எங்கள் மீது) என்று சொன்னீர்கள்?” என்று வினவினான். எமது நாயகம் ரஸூலுல்லாஹ், “யா அல்லாஹ்! என் உம்மத்தின் உடல்கள் என்னுடன் இல்லை என்றாலும் அவர்களின் ஆன்மா என்னுடன் இருக்கிறது. என் கருணை மற்றும் முழுமையான தயவு அவர்களுக்கு வெகு தொலைவில் இல்லை. நீ என்னை வாழ்த்தி எல்லாத் தீமைகளிலிருந்தும் என்னை விலக்கினாய். இறுதி யுகத்தின் ஃபித்னாவை (குழப்பங்கள், துன்பங்கள்) அனுபவித்த எனது அப்பாவி, துயரடைந்த உம்மத்தை விட்டு, இவ்வளவு பெரிய அருளையும் பரிசுகளையும் நான் எவ்வாறு தடுத்து நிறுத்த முடியும்? இப்படிப்பட்ட அருட்பாக்கியத்தை அவர்களிடமிருந்து நான் எப்படிப் பறிக்க முடியும்?" என்று சொன்னார்.

அல்லாஹு தஆலா, “என் ஹபீபே! இன்றிரவு நீர் என் விருந்தாளி. என்னிடம் என்ன வேண்டுமானாலும் கேட்பீராக” என்றான். எமது நாயகம் ரஸூலுல்லாஹ் (ஸல்லல்லாஹு அலைஹி வஸல்லம்) அவர்கள், "எனக்கு என் உம்மத் வேண்டும் (என் ரப்பே)" என்று கூறினார்.

ஒரு அறிவிப்பின்படி, ஹக் தஆலா இந்தக் கேள்வியை எழுநூறு முறை திரும்பத் திரும்பச் சொன்னான். “எனக்கு என் உம்மத் வேண்டும்” என்று எப்பொழுதும் எமது நாயகம் ரஸூலுல்லாஹ் அதே பதிலைக் கூறினார். அல்லாஹு தஆலா, “உமக்கு எப்பொழுதும் உமது உம்மத் வேண்டும்” என்று கூறியபோது, “என் ரப்பே! நான் ஆசைப்படுபவன், நீ கொடுப்பவன். எனக்காக என் உம்மத்தை மன்னித்துவிடு" என்றார். பின்னர் ஜனாப் அல்-ஹக், “இன்றிரவு உமக்காக உமது உம்மத்தை நான் மன்னித்தால், எனது கருணையும் உமது மகிமையும் வெளிப்படாது. இன்றிரவு உமக்காக உமது உம்மத்தின் ஒரு பகுதியினரை மன்னித்துவிட்டேன். இரண்டு பகுதியினர்களின் மன்னிப்பை ஒத்தி வைக்கிறேன். கியாமத் நாளில், நீர் விரும்புவீர், அப்போது நான் மன்னிப்பேன். அதனால் என் கருணையும் உமது மகிமையும் (கௌரவமும்) வெளிப்படும்." என்றான்.

எங்கள் அன்பிற்குரிய நபி (ஸல்லல்லாஹு அலைஹி வஸல்லம்) அவர்கள் தனது ஹதீஸ் அஷ்ஷரீஃப்களில் ஒன்றில் பின்வறுமாறு கூறுகிறார், “அன்றிரவு (மிஃராஜ் இரவு), நான் அல்லாஹு தஆலாவிடம் எனது உம்மத்தின் கணக்கை என்னிடம் ஒப்படைக்கும்படி கேட்டேன். ஹக் தஆலா, "முஹம்மதே! இதிலிருந்து நீர் விரும்புவது என்னவென்றால், உமது உம்மத்தின் தவறுகளை யாரும் அறியக்கூடாது என்பதைத் தானே! நீர் இரக்கமுள்ள நபி என்பதால் உமது உம்மத்தின் தவறுகள் மற்றும் அசிங்கமான செயல்கள் மற்றவர்களிடமிருந்து மட்டுமல்ல, உம்மிடமிருந்தும் மறைக்கப்பட வேண்டும் என்பதே எனது விருப்பம். முஹம்மதே! நீர் அவர்களுக்கு வழிகாட்டி. நான் அவர்களின் ரப். நீர் சமீபத்தில் அவர்களை சந்தித்தீர். நான் கடந்த காலத்திலிருந்து நித்தியம் வரை உமது உம்மத்தைப் பார்த்து வருகிறேன். முஹம்மதே! உமது உம்மத்துடன் உரையாடுவது எனக்குப் பிடிக்கவில்லை என்றால், கியாமத் நாளில் அவர்களைக் கணக்குக் கேட்க மாட்டேன். பெரியதோ சிறியதோ அவர்களுடைய பாவங்கள் எதையும் நான் கேட்கமாட்டேன்." என்று பதிலளித்தான்."

அல்லாஹு தஆலா, "முஹம்மதே! உமது அருள்மிகு கண்களைத் திறந்து உமது காலடியில் பார்ப்பீராக." என்றான். நான் பார்த்தேன் ஒரு கைப்பிடி மண்ணைக் கண்டேன். ஹக் தஆலா என்னிடம், "எல்லா உயிரினங்களும் உமது கால்களின் மண்ணாகும். அந்த மண்ணை நீர் நண்பரின் முன்னிலைக்குக் கொண்டு வந்தீரா? நேசத்துக்குரியவரின் ஆடையில் படிந்த தூசியை மன்னிப்பதை விட, உமது உம்மத்தை மன்னிப்பது எனக்கு எளிதானது" என்று கூறினான்.

என் ஹபீபே, உமது உம்மத்தை நான் உமக்கு வழங்குகிறேன்!
அவர்களுக்கு எனது ஜன்னத்தை வழங்கி விட்டேன்.
என் ஹபீபே, அது என்ன, நீர் விரும்பியதற்காக,
ஒரு பிடி மண்ணுக்காக, நீர் மன்றாடினீரா?

எமது அன்பிற்குரிய நபி (ஸல்லல்லாஹு அலைஹி வஸல்லம்) அவர்கள் தனது ஹதீஸ் அஷ்ஷரீஃப்களில் ஒன்றில், “நான் ஹக் தஆலாவிடம் பல கேள்விகளைக் கேட்டு, அவற்றின் பதில்களை செவிமடுத்தேன். நான் அவற்றைக் கேட்டதற்காக வருந்துகிறேன். (அவற்றில் சில:)

"என் ரப்பே! நீ ஜிப்ரஈலுக்கு ஆறு இலட்சம் இறக்கைகளைக் கொடுத்தாய். அதனுடன் ஒப்பிடுகையில், எனக்கு உனது உதவி என்ன?” என்று கேட்டேன். ஹக் தஆலா கூறினான், "என்னைப் பொறுத்தவரை, ஜிப்ரஈலின் ஆறு இலட்சம் சிறகுகளை விட உமது ஒரு முடி எனக்கு மிகவும் பிரியமானது. உமது ஒரு முடிக்காக, கீழ்ப்படியாத ஆயிரக்கணக்கான பாவிகளை கியாமத் நாளில் விடுதலை செய்வேன். முஹம்மதே! ஜிப்ரஈல் தனது இறக்கைகளைத் திறந்தால், அவை கிழக்கிற்கும் மேற்கிற்கும் இடையே உள்ள இடத்தை நிரப்புகின்றன. நீங்கள் பரிந்து பேசினால், கீழ்ப்படியாதவர்கள் கிழக்கிற்கும் மேற்கிற்கும் இடையே உள்ள இடத்தை நிரப்பினால், அவர்கள் அனைவரையும் உங்களுக்காக நான் மன்னிப்பேன்" என்று கூறினான். நான் மீண்டும், "என் தந்தை ஆதம் (அலைஹிஸ்ஸலாம்) அவர்களுக்கு முன்பாக வானவர்களை ஸஜ்தா செய்யச் செய்தாய். அதனுடன் ஒப்பிடும்போது, எனக்கு என்ன பரிசு வைத்துள்ளாய்?" என்று கேட்டேன்.

"ஆதமுக்கு மலக்குகள் ஸுஜூத் செய்தது உமது நூர் - ஒளி அவருடைய நெற்றியில் இருந்ததால்தான். முஹம்மதே! அதைவிட மேலான ஒன்றை உமக்கு நான் கொடுத்தேன். உமது பெயரை என்னுடைய பெயருக்கு நெருக்கமாக வைத்து அர்ஷ் அல்-அஃலாவில் எழுதினேன். அப்போது, ஆதம் படைக்கப்பட்டிருக்கவில்லை. அப்போது அவருடைய பெயரோ அடையாளமோ இருக்கவில்லை. வானத்தின் கதவுகளிலும், திரைகளிலும், ஜன்னாவின் வாயிலிலும், அரண்மனைகளிலும், மரங்களிலும், ஜன்னாவில் எங்கும் உமது பெயரை எழுதினேன். ஜன்னாவில் 'லா இலாஹ இல்லல்லாஹ் முஹம்மதுன் ரஸூலுல்லாஹ்' என்று எழுதப்படாத எதுவும் இல்லை. இந்த அந்தஸ்து, ஆதமுக்குக் கொடுக்கப்பட்ட அந்தஸ்தை விட அதிகம்." என்று ஹக் தஆலா கூறினான்.

உன்னதமானவரே, நான் உம்மை மிகவும் நேசிப்பதால், எப்படி இரு உலகங்களும் உம்முடையதாக இருக்க முடியாது, அழகே!
உமது இருப்பை எனது கண்ணாடியாக ஆக்கிவிட்டேன். எனது பெயருடன் சேர்த்து உமது பெயரையும் எழுதி வைத்துள்ளேன்."

"என் ரப்பே! நீ நூஹ் (அலைஹிஸ்ஸலாம்) அவர்களுக்குக் கப்பலைக் கொடுத்தாய். அதனுடன் ஒப்பிடும்போது, எனக்கு உனது உதவி என்ன?" என்றேன். அவன், "நான் உமக்கு புராக்கைக் கொடுத்து, ஒரே இரவில் தரையிலிருந்து அர்ஷுக்கு ஏறச் செய்தேன். நீர் ஜன்னாவையும் ஜஹன்னத்தையும் பார்த்தீர். கியாமத் நாளில் அவர்கள் கப்பலில் ஏறுவது போல் அந்த மஸ்ஜித்களில் ஏறி கண் இமைக்கும் நேரத்தில் ஸிராத் பாலத்தைக் கடந்து ஜஹன்னத்திலிருந்து விடுபட வேண்டும் என்பதற்காக நான் உமது உம்மத்துக்கு மஸ்ஜித்களை (பள்ளிவாயல்களை) கொடுத்தேன்" என்றான்.

"என் ரப்பே! நீ இஸ்ரவேலின் மக்களுக்கு மன்னாவையும் காடை போன்ற பறவை இறைச்சியையும் அனுப்பினாய்." என்றேன். அதற்கு ஹக் தஆலா இவ்வாறு கூறினான், "உமக்கும் உமது உம்மத்துக்கும் உலகத்திலும் ஆகிரத்திலும் அருட்கொடைகளை நான் வழங்கியுள்ளேன். நான் இஸ்ரவேலின் மக்களின் வடிவங்களை மனித உருவில் இருந்து கரடி, குரங்கு மற்றும் பன்றி வடிவமாக மாற்றினேன். உமது உம்மித்தினரில் யாருக்கும் நான் அப்படிச் செய்யவில்லை. அவர்களும் அவர்களைப் போலவே செயல்களைச் செய்தாலும், இந்தப் பேரழிவு அவர்களுக்கு ஏற்றதாக நான் கருதவில்லை. முஹம்மதே! தவ்ராத்திலும் இன்ஜீலிலும் அது போன்ற எந்த ஒரு ஸூராவும் இல்லாத, ஒரு ஸூராவை நான் உங்களுக்குக் கொடுத்தேன். அந்த ஸூரா ஸூரா அல் ஃபாத்திஹா. எவர் அந்த ஸூராவை ஓதுகிறாரோ அவருடைய உடல் ஜஹன்னமுக்கு ஹராமாகும். அந்த நபரின் பெற்றோரின் வேதனையை நான் குறைப்பேன். முஹம்மதே! நான் உம்மை விட அக்ரம் (மதிப்புமிக்க, உயர்ந்த, மரியாதைக்குரிய) யாரையும் படைக்கவில்லை. உமக்கும் உமது உம்மத்துக்கும் இரவிலும் பகலிலும் ஐம்பது முறை தொழுகையை நான் கடமையாக்கியுள்ளேன்.

முஹம்மதே! என் ஏகத்துவத்தை ஏற்று எனக்கு இணை கற்பிக்காதவர்களுக்கு ஜன்னா சொந்தமாகும். உமது உம்மத்தில் அப்படிப்பட்டவர்களுக்கு நான் ஜஹன்னமை ஹராமாக்கிவிட்டேன். என் கருணை உமது உம்மத்தின் மீது என் கோபத்தை மிகைத்து விட்டது."

"முஹம்மதே! என் பார்வையில், நீர் எல்லா மக்களையும் விட அதிக அக்ரம், மரியாதைக்குரியவர். கியாமத் நாளில், அனைவரையும் வியக்க வைக்கும் அத்தகைய பாக்கியங்களை நான் உமக்கு வழங்குவேன். எனது ஹபீபே! நீர் ஜன்னாவிற்குள் நுழையும் வரை, மற்ற நபிமார்களும் அவர்களின் உம்மத்துகளும் நுழைவது தடைசெய்யப்பட்டுள்ளது. உமது உம்மத் நுழையும் வரை, மற்ற உம்மத்கள் நுழைய மாட்டார்கள். முஹம்மதே! உமக்காகவும் உமது உம்மத்துக்காகவும் நான் தயார் செய்திருப்பதை நீர் பார்க்க விரும்புகிறீரா?" என்று அல்லாஹு தஆலா கேட்டான். நான், "ஆம், நான் விரும்புகிறேன், என் ரப்பே!" என்றேன். இஸ்ராபீலை நோக்கிய அவன், 'இஸ்ராபீலே! என்னுடைய அடியாரும் நம்பகமான தூதருமான ஜிப்ரஈலிடம், எனது ஹபீபை ஜன்னாவுக்கு அழைத்துச் செல்லும்படியும், என்னுடைய ஹபீபுக்காகவும் அவருடைய உம்மத்துக்காகவும் ஜன்னாவில் நான் தயாரித்துள்ளதை, அவருடைய அருள்மிகு மனம் கவலைகளிலிருந்து விடுபடும் வரை அவருக்குக் காட்டும்படியும் சொல்வீராக" என்றான்.”

"மிஃராஜ் என்பது காரணம் முடிந்து ஈமான் தொடங்கும் இடமாகும்."
ஹதீஸ் அஷ்-ஷரீஃப்

எமது அன்பிற்குரிய நபி, உலகத்தின் தலைவர், இஸ்ராபீல் அலைஹிஸ்ஸலாமுடன் ஜிப்ரஈல் அலைஹிஸ்ஸலாமிடம் வந்தார். அல்லாஹு தஆலாவின் கட்டளையை நிறைவேற்றுவதற்காக ஜிப்ரஈல் அலைஹிஸ்ஸலாம் நமது நபி (ஸல்லல்லாஹு அலைஹி வஸல்லம்) அவர்களை ஜன்னாவிடம் அழைத்துச் சென்றார். வானவர்கள் இரண்டு கைகளிலும் தட்டுகளுடன், ஒன்றில் ஜன்னாவின் ஆடையுடனும், மற்றொன்றில் நூருடனும் காத்திருந்தனர். ஜிப்ரஈல் அலைஹிஸ்ஸலாம், "ரஸூலுல்லாஹ்! இந்த வானவர்கள் ஆதம் அலைஹிஸ்ஸலாமுக்கு எண்பதாயிரம் ஆண்டுகளுக்கு முன் படைக்கப்பட்டவர்கள். அவர்கள் உங்கள் மீதும் உங்கள் உம்மத்தின் மீதும் தட்டுகளில் உள்ளதைப் பொழிவதற்கு எதிர்பார்த்துக் கொண்டிருக்கிறார்கள். கியாமத் நாளில், அல்லாஹு தஆலாவின் கட்டளைப்படி நீங்களும் உங்கள் உம்மத்தும் ஜன்னாவின் வாசலில் அடியெடுத்து வைக்கும் போது, இந்த வானவர்கள் உங்கள் மீது தட்டுக்களில் உள்ள நகைகளைப் பொழிவார்கள்." என்று கூறினார். ஜன்னாவின் பிரதான வானவர் ரிழ்வான் அவர்களை வரவேற்றார். அவர் எமது நபிக்கு நற்செய்தி கூறி, "ஹக் தஆலா ஜன்னாவை மூன்று பகுதிகளாக ஆக்கினான். அவற்றில் இரண்டை உங்கள் உம்மத்துக்கும், ஒன்றை மற்ற நபிமார்களின் உம்மத்துகளுக்கும் கொடுப்பதற்காக அவ்வாறு செய்தான்" என்றார். அவர் ஜன்னாவை நபியவர்களுக்கு முழுமையாகக் காட்டினார்.

எமது நாயகம் ஹபீப் அல்-அக்ரம் தொடர்ந்து கூறினார், “நான் ஜன்னாவின் மத்தியில் ஒரு நதியைக் கண்டேன். இது அர்ஷுக்கு மேலே பாய்கிறது. தண்ணீர், பால் நிறமானது, ஹம்ர் (ஜன்னாவின் மற்றொரு பானம்) மற்றும் தேன் ஆகியவை ஒரே இடத்திலிருந்து வெளியேறுகின்றன. அவை இரண்டும் ஒருபோதும் கலக்கவில்லை. அந்த ஆற்றின் விளிம்பு படிகப் பச்சை நிற (பளபளப்பான மரகதம் போன்ற விலையுயர்ந்த) கல் இருந்தது. அதில் உள்ள கற்கள் நகைகளாகவும், மண் அம்பராகவும், புற்கள் குங்குமமாகவும் இருந்தன. அதைச் சுற்றி வெள்ளிக் கோப்பைகளை அவர்கள் போட்டிருந்தார்கள்; அவற்றின் எண்ணிக்கை வானத்தில் உள்ள நட்சத்திரங்களை விட அதிகமாக இருந்தது. அது பறவைகளால் சூழப்பட்டிருந்தது, அவற்றின் கழுத்து ஒட்டகக் கழுத்தைப் போல இருந்தது. அந்த நதியிலிருந்து அவற்றின் இறைச்சி மற்றும் பானங்களை உண்பவர் ஹக் தஆலாவின் ரிழாவை (திருப்தியை) அடைகிறார். நான் ஜிப்ரஈலிடம், "இது என்ன நதி?" என்று கேட்டேன். அவர், "இதுதான் கவ்ஸர். ஹக் தஆலா இதனை உங்களுக்கு வழங்கியுள்ளான். இந்த கவ்ஸர் ஆற்றில் இருந்து எட்டு ஜன்னாக்களில் உள்ள பழத்தோட்டங்களுக்கு தண்ணீர் செல்கிறது." என்றார். அந்த ஆற்றின் கரையில் கூடாரங்களைப் பார்த்தேன்.

"என் ஹபீபே! என் கட்டளைகளைக் கடைப்பிடிப்பவர் வேதனையிலிருந்தும் தண்டனையிலிருந்தும் காப்பாற்றப்படுகிறார், என் கருணையைப் பெறுகிறார், மேலும் ஜன்னாவில் என்னைக் காணும் பெருமையைப் பெறுகிறார்."
ஹதீஸ் அல்குத்ஸி

அவை அனைத்தும் முத்து மற்றும் மாணிக்கங்களால் ஆனவையாக இருந்தன. நான் ஜிப்ரஈலிடம் அவை பற்றிக் கேட்டேன். அவர் "அவை உமது மனைவிகளின் இருப்பிடங்கள்" என்றார். அந்தக் கூடாரங்களில் ஹூரீக்களை (ஜன்னாவின் பணிப்பெண்களை) பார்த்தேன். அவர்களின் முகங்கள் சூரியனைப் போல பிரகாசித்துக் கொண்டிருந்தன. அவர்கள் பலவிதமான இனிமையான மெல்லிசைகளுடன் பேசிக் கொண்டிருந்தனர். அவர்கள், "நாங்கள் ஆனந்தமாகவும் மகிழ்ச்சியாகவும் இருக்கிறோம். எந்த சோகமும் எமக்கு வராது. நாங்கள் மூடப்பட்டுள்ளோம்; நாங்கள் ஒருபோதும் நிர்வாணமாக இல்லை. நாம் இளமையானவர்கள்; எமக்கு ஒருபோதும் வயதாகாது. நாங்கள் நல்ல இயல்புடையவர்கள்; நாங்கள் ஒருபோதும் கோபப்படுவதில்லை. நாம் எப்போதும் அவ்வாறுதான் இருப்போம்; நாம் ஒருபோதும் இறக்க மாட்டோம்" என்று பேசிக் கொண்டிருந்தனர். இன்பத்தின் அரண்மனைகள் மற்றும் மரங்களை அடைந்து, அவர்களின் இசை மற்றும் குரல்கள் எல்லா இடங்களிலும் பரவியது. இவர்களின் குரல்கள் மிகவும் இனிமையானவை, அந்த இசை உலகில் வந்தால், மரணமும் துன்பமும் உலகில் இருக்காது. ஜிப்ரஈல் என்னிடம், "அவர்களின் முகங்களைப் பார்க்க விரும்புகிறீர்களா?" என்றார். நான், “ஆம்" என்றேன். அவர் ஒரு கூடாரத்தின் கதவைத் திறந்தார். நான் பார்த்தேன். என் வாழ்நாள் முழுவதும் அவற்றின் அழகை வர்ணித்தால் என்னால் முடிக்க முடியாத அளவுக்கு அழகான தோற்றங்களைப் பார்த்தேன். அவர்களின் முகம் பாலை விட வெண்மையாகவும், கன்னங்கள் மாணிக்கத்தை விட சிவப்பாகவும், சூரியனை விட பிரகாசமாகவும் இருந்தன. அவர்களின் தோல்கள் பட்டை விட மென்மையாகவும், சந்திரனைப் போல பிரகாசமாகவும் இருந்தன; அவர்களின் வாசனை கஸ்தூரியை விட அதிகமாக இருந்தது. அவர்களின் தலைமுடி மிகவும் கறுப்பாக இருந்தது. அவற்றில் சில பின்னப்பட்டும், சில பின்னால் கட்டப்பட்டும், சில தளர்த்தி விடப்பட்டும் இருந்தன. அதனால் அவர்கள் உட்கார்ந்தால், அவர்களின் தலைமுடி அவர்களைச் சுற்றி கூடாரங்கள் போல இருக்கும்; அவர்கள் எழுந்து நின்றால், அவர்களின் தலைமுடி அவர்களின் கால்களை எட்டும். அவர்கள் ஒவ்வொருவருக்கும் முன்னால் ஒரு பணிப்பெண் நின்றிருந்தார். ஜிப்ரஈல், "அவர்கள் உங்கள் உம்மத்துக்காக இருப்பவர்கள்" என்றார்."

எமது நாயகம், நபி (ஸல்லல்லாஹு அலைஹி வஸல்லம்) அவர்கள் கூறினார்கள், "நான் பழத்தோட்டங்கள், திராட்சைத் தோட்டங்கள் மற்றும் எட்டு ஜன்னாக்களின் அனைத்துப் பாக்கியங்களையும் பார்த்தேன். ஜஹன்னத்தையும் அதன் அடுக்குகளையும் பார்க்க வேண்டும் என்று நினைத்தேன். என் கையைப் பிடித்தபடி, ஜஹன்னமின் மிக உயர்ந்த வானவரான மாலிக்கிடம் ஜிப்ரஈல் என்னை அழைத்துச் சென்றார். அவர், "மாலிகே! ஹஸ்ரத் முஹம்மத் (ஸல்லல்லாஹு அலைஹி வஸல்லம்) ஜஹன்னத்தில் உள்ள எதிரிகளின் இடங்களைப் பார்க்க விரும்புகிறார். ஜஹன்னத்தை அவருக்குக் காட்டுங்கள்." என்றார்.” மாலிக் ஜஹன்னத்தின் திரையைக் கழற்றியதும், அது கொதித்து பெருகத் தொடங்கியது. ஜஹன்னத்தைப் பிடித்து எரிப்பதையும், ஜஹன்னமின் தாகம், சங்கிலிகள், பாம்புகள், தேள்கள் மற்றும் அங்குள்ள சில சித்திரவதைகளையும் எமது நபிகள் நாயகம் (அலைஹிஸ்ஸலாது வஸ்ஸலாம்) நெருக்கமாகப் பார்த்தார்.

“மாலிக் ஜஹன்னத்தின் அடுக்குகளைத் திறந்தார். நான் ஏழு அடுக்குகளையும் (அனைத்தையும்) பார்த்தேன். ஏழாவது அடுக்கு ஹாவியா என்று அழைக்கப்படுகிறது. அதன் வேதனை மற்ற அடுக்குகளை விட பல மடங்கு அதிகமாக இருந்தது. நான் மாலிக்கிடம், "இந்த அடுக்கில் எந்தக் குழு துன்புறுத்தப்படும்?" என்று கேட்டேன். அதற்கு மாலிக், 'ஃபிர்அவ்ன், காரூன் மற்றும் உங்கள் உம்மத்தின் முனாஃபிக்குகள் (நயவஞ்சகர்கள்) அங்கு வேதனை செய்யப்படுவார்கள்" என்று பதிலளித்தார். ஆறாவது அடுக்கு லாஸி. காஃபிர்கள் (மதமற்றவர்கள்) அங்கு வேதனைப்படுவார்கள். ஐந்தாவது அடுக்கு ஹுதமா. நெருப்பு அல்லது பசுக்களை வணங்குபவர்கள் அங்கு துன்புறுத்தப்படுவார்கள். நான்காவது அடுக்கு ஜஹீம். அங்கே சூரியனையும் நட்சத்திரங்களையும் வழிபடுபவர்கள் வேதனைப்படுவார்கள். மூன்றாவது அடுக்கு ஸகர். நஸாராக்கள் அங்கே துன்புறுத்தப்படுவார்கள். இரண்டாவது அடுக்கு ஸஈர். அங்கே யஹூதிகள் துன்புறுத்தப்படுவார்கள். முதல் அடுக்கு ஜஹன்னம். மற்ற அடுக்குகளின் வேதனையை விட இதன் வேதனை குறைவாக இருந்தது. (இருந்தாலும்) அங்கே எழுபதாயிரம் நெருப்புக் கடல்களைக் கண்டேன். ஒவ்வொரு கடலும் மிகப் பெரியதாக இருந்ததால், உலகங்களையும், வானங்களையும் அதிலே எறிந்துவிட்டு, ஒரு வானவரை நியமித்தால், ஆயிரம் ஆண்டுகள் தேடினாலும் அவற்றைக் கண்டுபிடிக்க முடியாது. ஸபானியாக்கள் மிகவும் பிரமாண்டமானவர்கள், அவர்களில் ஒருவர் தனது வாயின் ஒரு பக்கத்தில் உலகங்களையும் வானங்களையும் வைத்தாலும், அவர்கள் காண மாட்டார்கள். அந்தக் கடல்கள் அலைமோதும், பயங்கரமான ஒலிகள் கேட்கும். அந்த ஓசையில் சிறிதளவு உலகிற்கு வந்தால் அனைத்து உயிரினங்களும் அழிந்துவிடும். நான், "இந்த அடுக்கு எந்தக் குழுவுக்கு?" என்று கேட்டேன். மாலிக் பதில் சொல்லவில்லை. நான் மீண்டும் கேட்டேன், அவர் அமைதியாக இருந்தார்...

ஜிப்ரஈல் மாலிக்கிடம், "அவர் உங்களிடமிருந்து பதிலுக்காகக் காத்திருக்கிறார்" என்றார். "மன்னிக்கவும்" என்று கூறி மன்னிப்புக் கேட்டார். எதுவாக இருந்தாலும் பதில் சொல்லுங்கள் அப்போதுதான் தீர்வு காண முடியும் என்றேன். அதற்கு மாலிக், 'ரஸூலல்லாஹ்வே! இது உங்கள் உம்மத்தின் கீழ்ப்படியாதவர்களுக்கானது. இந்தப் பயங்கரமான இடத்திலிருந்து அவர்கள் தங்களைக் காப்பாற்றிக் கொள்ளவும், அவர்களை இந்த வேதனைக்கு இட்டுச் செல்லும் விஷயங்களில் இருந்து விலகி இருக்கவும் அவர்களுக்கு அறிவுரை கூறுங்கள். அந்த நாளில், கீழ்ப்படியாதவர்கள் மீது நான் பரிதாபப்பட மாட்டேன். அவர்களில் வயதானவர்களிடமோ அல்லது சிறியவர்களிடமோ நான் இரக்கம் காட்ட மாட்டேன்." என்றார்.

உலகத்தின் நாயகம் அழத் தொடங்கினார். அவரது பாக்கியம்வாய்ந்த தலையில் இருந்து தலைப்பாகையைக் கழற்றி, அவர் பரிந்து பேசவும் (அல்லாஹு தஆலாவிடம்) மன்றாடவும் தொடங்கினார். அவருடைய உம்மத் பலவீனமானது என்றும், அவர்களால் அத்தகைய வேதனையைத் தாங்க முடியாது என்றும் கூறி, ஜிப்ரஈல் அலைஹிஸ்ஸலாம் மற்றும் பிற வானவர்களும் அழுதார்கள். அல்லாஹு தஆலா, “என் ஹபீபே! உங்கள் மானமும் மதிப்பும் என் பார்வையில் உயர்ந்தது; உங்கள் பிரார்த்தனை ஏற்கப்பட்டது. மகிழ்ந்திருங்கள். உமது ஆசையை நிறைவேற்றி விட்டேன். நீங்கள் போதும் என்று சொல்லும் வரை, கீழ்ப்படியாத பலரை உமது பரிந்துரையால் மன்னிக்கக்கூடிய பதவியை உமக்கு நான் தருவேன். எனது ஹபீபே! என் கட்டளைகளைக் கடைப்பிடிப்பவர் வேதனையிலிருந்தும் தண்டனையிலிருந்தும் காப்பாற்றப்படுகிறார், என் கருணையைப் பெறுகிறார், மேலும் ஜன்னத்தில் என்னைக் காணும் பெருமையைப் பெறுகிறார். இரவிலும் பகலிலும் ஐம்பது நேரத் தொழுகையை உங்களுக்கும், உங்கள் உம்மத்துக்கும் கடமையாக ஆக்கியுள்ளேன்."

எமது நபி (ஸல்லல்லாஹு அலைஹி வஸல்லம்) அவர்கள் தொடர்ந்து பின்வருமாறு கூறினார்கள், “(அந்தத் தரத்திற்குப் பிறகு, நான் அர்ஷை அடைந்தேன். விண்ணுலகைக் கடந்து, நான் மூஸா (அலைஹிஸ்ஸலாம்) அவர்கள் இருந்த நிலைக்கு வந்தேன். அவர் என்னிடம், "ஹக் தஆலா உங்களுக்கும் உங்கள் உம்மத்துக்கும் என்ன பர்ள் - விதியாக ஆக்கினான்?" என்று வினவினார். நான், "ஒவ்வொரு நாளும் இரவும் பகலும் ஐம்பது முறை தொழுகையை அவன் எனக்கு பர்ளாக ஆக்கினான்" என்று சொன்னேன். அதற்கு அவர், 'உமது ரப்பிடம் திரும்பிச் செல்லுங்கள், அதைக் கொஞ்சம் இலகுபடுத்தச் சொல்லுங்கள். உங்கள் உம்மத்தால் அதை சமாளிக்க முடியாது. நான் இஸ்ரவேல் மக்களை சோதித்துப் பார்த்தேன்." என்றார். அதன்பிறகு, நான் எனது ரப்பிடம் திரும்பிச் சென்று, "என் ரப்பே! தயவு செய்து (இந்தக் கட்டளையை) என் உம்மத்துக்குக் கொஞ்சம் இலகுவாக்குவாயாக!" என்றேன். பின்னர், அவன் ஐம்பது தடவைகளில் ஐந்தை மட்டுமே குறைத்தான். நான் மீண்டும் மூஸா (அலைஹிஸ்ஸலாம்) அவர்களிடம் சென்று (அவன் ஐந்து முறை குறைத்துக் கொண்டான்) என்று கூறினேன். அவர், "உம் ரப்பிடம் திரும்புங்கள்! அதை இன்னும் கொஞ்சம் குறைக்கும்படி அவனிடம் கேளுங்கள். ஏனென்றால், உங்கள் உம்மத்தால் இதை நிறைவேற்ற முடியாது." என்றார். இவ்வாறு, நான் மூஸா (அலைஹிஸ்ஸலாம்) அவர்களுக்கும் எனது ரப்புக்கும் இடையில் முன்னும் பின்னுமாகச் சென்றேன். கடைசியாக அல்லாஹு தஆலா இவ்வாறு கூறினான், "நான் இந்தத் தொழுகையை ஐந்து தடவைகளாகக் குறைத்துவிட்டேன். ஒவ்வொரு தொழுகைக்கும் பத்து ஸவாப்கள் (வெகுமதிகள்) உள்ளன. இந்த வகையில், அவர்கள் மீண்டும் ஐம்பது முறைகள் செய்கிறார்கள். ஏனெனில், எவர் ஒரு ஸவாப் செய்ய நினைத்தாலும் அதைச் செய்ய முடியாதவர் ஒரு ஸவாபை அடைகிறார். ஆனால் அவர் அதைச் செய்தால், அவர் ஒன்றுக்காக பத்து ஸவாப்களை அடைகிறார். இருப்பினும், அவர் ஒரு பாவத்தைச் செய்ய நினைத்தாலும் அதைச் செய்யவில்லை என்றால், எதுவும் எழுதப்படுவதில்லை. ஆனால், அவர் செய்தால், அது ஒரே ஒரு பாவமாக மட்டுமே பதிவு செய்யப்படுகிறது." பின்னர் நான் மூஸா (அலைஹிஸ்ஸலாம்) அவர்களிடம் சென்று நிலைமையை விளக்கினேன். மீண்டும், "திரும்பிச் சென்று, இன்னும் கொஞ்சம் இலகுபடுத்தச் சொல்லுங்கள்" என்றார். அதன் பிறகு, நான் அவரிடம், "நான் என் ரப்பிடம் பல தடவைகள் மன்றாடியதால், இப்போது நான் வெட்கப்படுகிறேன்" என்று கூறினேன்.”5

இவ்வாறு, அல்லாஹு தஆலா எமது அன்பான நபி அனுபவித்த இன்னல்களால் வேதனைப்பட்ட அவரது அருள்மிகு இதயத்தை ஆறுதல்படுத்தினான். அவன் தனது எந்தப் படைப்பினங்களுக்கும் வழங்காத, யாராலும் அறிய முடியாத அல்லது புரிந்துகொள்ள முடியாத வரங்களை அவருக்கு வழங்கினான்.

அன்பின் தீயால் எரிகிறவரே,
அவர்கள் நேசனை நேசிப்பதாக நினைப்பவரே, இங்கே வருக.
அந்த ஷாவின் மிஃராஜை விரிவாகக் கேட்பீராக,
நீங்கள் நேசிக்கிறீர்கள் என்றால், அன்பின் தீயில் எரிவீராக.
திங்கட்கிழமை இரவு உண்மையான செய்தி வந்தது,
அதுதான் கத்ர் இரவு என்று தெரிகிறது.
அந்த அருள்வாய்ந்த, விலைமதிப்பற்ற இரவு,
உம்மு ஹானியின் வீட்டில் இருந்தது.
இதற்கு முன் யாரும் இந்த வரத்தை அடையவில்லை,
யாரும் அந்த உயரத்தை எட்டவில்லை. ஏனெனில்
அவர் அனைத்தையும் பார்த்துவிட்டு அப்பால் சென்று வந்து,
அந்த ஹத்ரத்தை அடைந்தார்.
இடம் தேவையில்லாத அந்த துல்ஜலால்,
பண்புகள் இன்றி, தன்னைக் காட்டினான்.
அவர் ரப்புல் இஸ்ஸத்தை தெளிவாகக் கண்டார்,
அவருடைய உம்மத் ஆகிரத்தில் அப்படித்தான் காண்பார்கள்.
நீர் மிஃராஜ் செய்து தொழுகை நடத்தினீர்;
நான் உமது சமுதாயத்தின் மிஃராஜாக தொழுகையை ஆக்கினேன்.